वारसा अजितदादांचा, कार्यशैली सुनेत्रावहिनींची!; शासकीय रुग्णालयातील अचानक पाहणीने बारामतीत चर्चांना उधाण

बारामती : बारामतीच्या राजकीय आणि सामाजिक वर्तुळात सध्या एकाच विषयाची चर्चा रंगली आहे. उपमुख्यमंत्री सुनेत्रा अजित पवार यांनी कोणतीही पूर्वसूचना न देता बारामतीतील पुण्यश्लोक अहिल्यादेवी होळकर शासकीय रुग्णालय व वैद्यकीय महाविद्यालयाला दिलेल्या अचानक भेटीमुळे प्रशासनासह सर्वांचेच लक्ष वेधले गेले आहे. रुग्णालयातील विविध विभागांची पाहणी करत त्यांनी रुग्णांना मिळणाऱ्या सुविधा, स्वच्छतेची स्थिती, औषधांचा पुरवठा, उपचार पद्धती तसेच एकूण व्यवस्थापनाची सखोल माहिती घेतली.

उपमुख्यमंत्री सुनेत्रा पवार यांनी केवळ अधिकाऱ्यांकडून माहिती घेण्यापुरते मर्यादित न राहता प्रत्यक्ष रुग्णांशी आणि त्यांच्या नातेवाईकांशी संवाद साधल्याची माहिती समोर आली आहे. रुग्णालयात येणाऱ्या सर्वसामान्य नागरिकांना कोणत्या अडचणींचा सामना करावा लागतो, याचीही त्यांनी बारकाईने चौकशी केली. त्यामुळे ही भेट केवळ औपचारिक न राहता प्रत्यक्ष परिस्थिती जाणून घेण्याचा प्रयत्न असल्याचे बोलले जात आहे.
मागील काही महिन्यांपासून शासकीय वैद्यकीय महाविद्यालय आणि रुग्णालयातील काही बाबींवर नागरिकांकडून नाराजी व्यक्त केली जात होती. रुग्णांची होत असलेली गैरसोय, काही ठिकाणी सुविधांचा अभाव, स्वच्छतेबाबतचे प्रश्न आणि प्रशासनाच्या कार्यपद्धतीवर उपस्थित होणारे सवाल यामुळे आरोग्य व्यवस्थेवर टीका होत होती. अशा पार्श्वभूमीवर उपमुख्यमंत्री सुनेत्रा पवार यांनी स्वतः पुढाकार घेऊन परिस्थितीची प्रत्यक्ष पाहणी केल्याने नागरिकांमध्ये समाधान व्यक्त केले जात आहे.

बारामतीकरांमध्ये या दौऱ्याची तुलना दिवंगत उपमुख्यमंत्री अजितदादा पवार यांच्या कार्यशैलीशी केली जात आहे. कोणतीही पूर्वकल्पना न देता विविध शासकीय कार्यालये, विकासकामे किंवा सार्वजनिक सुविधांची पाहणी करून संबंधित अधिकाऱ्यांना जबाबदार धरण्याची शैली अजितदादा पवार यांची ओळख मानली जात होती. सुनेत्रा पवार यांच्या या दौऱ्यातही त्याच कार्यपद्धतीची झलक दिसल्याची चर्चा शहरात रंगली आहे.

स्थानिक नागरिकांमध्येही या भेटीबाबत सकारात्मक प्रतिक्रिया उमटत आहेत. आरोग्य सेवेशी संबंधित प्रश्नांवर थेट लक्ष केंद्रित करून प्रशासनाला सतर्क करण्याचा प्रयत्न या माध्यमातून झाल्याचे मत व्यक्त केले जात आहे. रुग्णालयातील त्रुटी दूर करून नागरिकांना अधिक चांगल्या सुविधा उपलब्ध करून देण्यासाठी या भेटीचा निश्चितच सकारात्मक परिणाम होईल, अशी अपेक्षा व्यक्त केली जात आहे.

दरम्यान, उपमुख्यमंत्री सुनेत्रा पवार यांनी आरोग्य सेवांबाबत कोणतीही तडजोड सहन केली जाणार नसल्याचा स्पष्ट संदेश या पाहणीतून दिल्याचे मानले जात आहे. त्यामुळे आगामी काळात शासकीय रुग्णालय आणि वैद्यकीय महाविद्यालयातील सेवा अधिक सक्षम आणि रुग्णकेंद्रित करण्यासाठी प्रशासनाकडून ठोस पावले उचलली जातील, अशी अपेक्षा बारामतीकर व्यक्त करत आहेत.

“गाजावाजा नाही, थेट कृती” हीच कार्यशैली; आणि म्हणूनच बारामतीत आता चर्चा सुरू आहे – वारसा अजितदादांचा, कार्यशैली सुनेत्रावहिनींची!