‘दादा’ गेले आणि धाकही गेला? बारामतीतील वाढत्या गुन्हेगारीवरून पोलीस प्रशासनाला सवाल

बारामती : बारामती शहर व परिसरात अलीकडच्या काळात घडणाऱ्या विविध गुन्हेगारी घटनांमुळे नागरिकांमध्ये चिंता व्यक्त होत असून, शहरातील चौकाचौकांत कायदा-सुव्यवस्थेबाबत चर्चा सुरू झाली आहे. अवैध धंदे, खून, आत्महत्या, जबरी चोरी यांसारख्या गंभीर घटनांमुळे बारामतीच्या कायदा-सुव्यवस्थेवर प्रश्नचिन्ह उपस्थित होत आहे. त्यातच काही प्रकरणांमध्ये पोलिस प्रशासनाच्या कार्यपद्धतीवरही नागरिकांकडून नाराजी व्यक्त होताना दिसत आहे.

दिवंगत माजी उपमुख्यमंत्री अजित पवार यांच्या निधनानंतर बारामतीतील प्रशासनावर पूर्वीसारखा राजकीय दबाव आणि नियंत्रण राहिले आहे का? असा सवाल आता नागरिकांकडून उपस्थित केला जात आहे. ‘अजितदादा असते तर बारामतीवर अशी वेळ आलीच नसती’, अशी चर्चाही शहरातील विविध भागांत ऐकायला मिळत आहे. त्यांच्या काळात गुन्हेगारी प्रवृत्तीच्या व्यक्तींवर तसेच प्रशासनावर त्यांचा दबाव आणि धाक होता, त्यामुळे कायदा-सुव्यवस्था अधिक प्रभावीपणे हाताळली जात होती, अशी भावना काही नागरिक व्यक्त करीत आहेत.
मात्र, आजच्या परिस्थितीत बारामतीत वाढत्या गुन्हेगारी घटनांमुळे प्रशासन नेमके कुठे कमी पडत आहे, असा प्रश्न निर्माण झाला आहे. गुन्हे घडल्यानंतर कारवाई करण्याबरोबरच गुन्हे घडू नयेत यासाठी प्रतिबंधात्मक उपाययोजना कितपत प्रभावीपणे राबवल्या जात आहेत, याकडेही नागरिकांचे लक्ष लागले आहे.

बदलीचे आदेश होऊनही काही कर्मचारी जुन्याच ठिकाणी?

दरम्यान, बारामतीत वर्षानुवर्षे एकाच ठिकाणी कार्यरत असलेल्या काही पोलीस कर्मचाऱ्यांच्या बदल्यांचे आदेश होऊनही ते बदलीच्या ठिकाणी अद्याप रुजू होत नसल्याची चर्चा आहे. बदली झाल्यानंतरही स्थानिक पातळीवर दीर्घकाळ संपर्क आणि ओळखी कायम राहिल्यास त्याचा कायदा-सुव्यवस्थेवर परिणाम होण्याची शक्यता नाकारता येत नाही.

एकाच ठिकाणी दीर्घकाळ कार्यरत असलेल्या कर्मचाऱ्यांच्या स्थानिक पातळीवरील ओळखी, संबंध आणि संपर्क यांचा गैरफायदा कोणाकडून घेतला जात आहे का, याचीही वरिष्ठ अधिकाऱ्यांनी तपासणी करण्याची गरज असल्याची नागरिकांची मागणी आहे.

बदलीचे आदेश झाल्यानंतर संबंधित कर्मचाऱ्यांना तातडीने नवीन नियुक्तीच्या ठिकाणी रुजू करून घेणे, दीर्घकाळ एकाच ठिकाणी कार्यरत असलेल्या कर्मचाऱ्यांच्या नियुक्त्यांचा आढावा घेणे आणि संवेदनशील ठिकाणी पारदर्शक पद्धतीने नियुक्त्या करणे आवश्यक असल्याचे नागरिकांचे म्हणणे आहे.

स्थानिक गुन्हे शाखेच्या कार्यपद्धतीवरही प्रश्न

गुन्हेगारीला आळा घालण्यात स्थानिक गुन्हे शाखेची भूमिका अत्यंत महत्त्वाची असते. गुन्हेगारांवर वचक निर्माण करणे, गंभीर गुन्ह्यांचा तपास करणे, फरार आरोपींचा शोध घेणे तसेच अवैध धंद्यांवर कारवाई करणे ही या शाखेची महत्त्वाची जबाबदारी आहे.
मात्र, स्थानिक गुन्हे शाखेतील काही कर्मचाऱ्यांच्या बदल्या आणि नियुक्त्यांबाबत आता गंभीर प्रश्न उपस्थित होत आहेत. या शाखेत बदली होऊन आलेल्या काही कर्मचाऱ्यांवर पूर्वी आरोप झाले असल्याची किंवा काही प्रकरणांमध्ये त्यांची नावे समोर आल्याची चर्चा आहे. अशा कर्मचाऱ्यांना संवेदनशील आणि महत्त्वाच्या स्थानिक गुन्हे शाखेत नेमण्यामागे प्रशासनाचा नेमका उद्देश काय? असा सवाल नागरिकांकडून उपस्थित होत आहे.
मात्र, कोणत्याही कर्मचाऱ्यावरील आरोप हे न्यायालयीन दोषसिद्धीच्या बरोबरीचे नसतात. त्यामुळे अशा आरोपांची वस्तुस्थिती काय आहे, संबंधित प्रकरणांमध्ये चौकशी अथवा न्यायालयीन प्रक्रिया कोणत्या टप्प्यावर आहे, याची वरिष्ठ पातळीवर निष्पक्ष पडताळणी होणे आवश्यक आहे.

‘बारामतीतील गुन्हेगारीवर नियंत्रण मिळवायचे आहे की गुन्हेगारांना पाठीशी घालणाऱ्या व्यक्तींना संरक्षण द्यायचे आहे?’ असा संतप्त सवाल नागरिकांमधून उपस्थित केला जात आहे. या आरोपांमध्ये तथ्य आहे का, याची चौकशी करून प्रशासनाने वस्तुस्थिती स्पष्ट करावी, अशीही मागणी होत आहे.

बारामती शहर आणि ग्रामीण भागात अवैध धंद्यांवर सातत्याने कारवाई होत असली तरी अशा धंद्यांना कायमस्वरूपी आळा का बसत नाही, हा प्रश्नही कायम आहे. एखाद्या ठिकाणी कारवाई झाल्यानंतर काही दिवसांनी पुन्हा तोच प्रकार सुरू होत असेल, तर त्यामागील यंत्रणा शोधून काढण्याची गरज आहे.

अवैध धंदे, गुन्हेगारी टोळ्या आणि स्थानिक पातळीवरील गैरप्रकार यांच्यातील संभाव्य संबंधांची वरिष्ठ अधिकाऱ्यांनी तपासणी करावी. केवळ छोट्या कारवायांपुरते न थांबता अवैध व्यवसाय चालविणाऱ्यांमागील मुख्य सूत्रधारांपर्यंत पोहोचण्याची मागणी नागरिकांकडून होत आहे.

‘दादांचा धाक’ ही भावना की प्रशासनासमोर आव्हान?

दिवंगत माजी उपमुख्यमंत्री अजितदादा पवार यांच्या निधनानंतर बारामतीच्या राजकीय आणि प्रशासकीय वातावरणात मोठा बदल झाला आहे. त्यामुळे ‘दादांचा धाक गेला म्हणून गुन्हेगारी वाढली का?’ असा सवाल काही नागरिक उपस्थित करीत आहेत. मात्र, कायदा-सुव्यवस्था सक्षम, निष्पक्ष आणि कायद्याच्या चौकटीत काम करणाऱ्या पोलिस यंत्रणेच्या माध्यमातून कायम राखली जाणे अपेक्षित आहे.त्यामुळे आजचा खरा प्रश्न हा ‘दादांचा धाक ?’ एवढाच नसून, बारामतीच्या नागरिकांना सुरक्षित वातावरण देण्यासाठी पोलीस प्रशासन किती सक्षम आणि प्रभावीपणे काम करीत आहे? हा आहे.

वाढत्या गुन्हेगारीच्या पार्श्वभूमीवर वरिष्ठ पोलीस अधिकाऱ्यांनी बारामतीतील परिस्थितीची गांभीर्याने दखल घेऊन पोलीस कर्मचाऱ्यांच्या नियुक्त्या, बदल्यांची अंमलबजावणी, स्थानिक गुन्हे शाखेची कार्यपद्धती आणि अवैध धंद्यांवरील कारवाई यांचा सखोल आढावा घ्यावा, अशी मागणी नागरिकांकडून होत आहे.
दिवंगत अजितदादा पवार यांच्या अनुपस्थितीत बारामतीतील प्रशासनाचा धाक कमी झाला आहे का, की पोलीस प्रशासनाची कार्यपद्धतीच बदलली आहे? या प्रश्नाचे स्पष्ट उत्तर आता बारामतीकरांना अपेक्षित आहे.