१४ डिसेंबरच्या लोकन्यायालयात महावितरणच्या सवलतीचा फायदा घ्यावा… न्या.आर सी बर्डे,सोनल पाटील यांचे आवाहन
बारामती : जिल्ह्यात शनिवार दिनांक १४ डिसेंबर रोजी आयोजित करण्यात येणाऱ्या राष्ट्रीय लोकअदालतमध्ये वीज चोरीची १२२ तर ‘महावितरण अभय योजना -२०२४’ अंतर्गत दाखलपुर्व ४० हजाराहून अधिक तडजोडयुक्त प्रकरणे निवडण्यात आली आहेत.या सर्व प्रकरणामध्ये विविध सवलती देण्यात येणार आहेत त्याचा नागरिकांनी फायदा घ्यावा असे आवाहन बारामती जिल्हा न्यायाधीश आर सी बर्डे, पुणे जिल्हा विधी सेवा प्राधिकरणाच्या सचिव श्रीमती सोनल पाटील व बारामती वकील संघटनेचे अध्यक्ष अॅड प्रभाकर बर्डे तसेच महावितरण यांनी केले आहे.
पुणे जिल्हा विधीसेवा प्राधिकरणामार्फत आयोजित राष्ट्रीय लोकअदालतमध्ये वीज चोरी आणि थकबाकीची पुणे शहर आणि जिल्ह्यातून दाखल प्रकरणे निवडण्यात आली आहेत. यामध्ये ग्राहकांना तडजोडीच्या माध्यमातून विविध सवलती मिळणार आहेत. या योजनांमध्ये प्रामुख्याने वीज कायदा कलम १३५ आणि १३८ अंतर्गत येणाऱ्या प्रकरणाचा समावेश आहे. वीज चोरी प्रकरणात कोर्टात दोषरोपपत्र दाखल नसेल तर लोक अदालतमध्ये ग्राहक दाखल पूर्व प्रकणात तडजोड करू शकतात. वीज चोरी प्रकरणात लोक अदालतमध्ये तडजोड केल्यास ग्राहकास वीज बिलात १० ते १५ टक्के सवलत मिळू शकते.
महावितरणने २९ ऑगस्ट २०२४ पासून ‘महावितरण अभय योजना -२०२४’ ही कायमस्वरुपी वीज पुरवठा बंद करण्यात आलेल्या ग्राहकासाठी सुरू केली आहे. यामध्ये बिलाची संपूर्ण थकबाकी भरल्यास १०० टक्के व्याज व विलंब आकार माफ केला जातो. तसेच ग्राहकास थकबाकी एकरकमी भरण्याचा किंवा ३० % डाऊन पेमेंटसह जास्तीत जास्त सहा हप्त्यात भरण्याचा पर्याय उपलब्ध आहे. याशिवाय उच्चदाब ग्राहकांनी मूळ थकबाकी एकरकमी भरल्यास ५ %, तर लघुदाब ग्राहकास १० % अतिरिक्त सवलत दिली जाणार आहे. यानंतर ग्राहकास आहे त्याचा जागेवर किंवा अन्यत्र पुन्हा वीज पुरवठा कनेक्शन दिले जाईल.
तरी जास्तीत जास्त ग्राहकांनी लोकअदालतच्या माध्यमातून वीज चोरीत फौजदारी आणि कायमस्वरूपी वीज पुरवठा खंडित प्रकरणात तडजोड करून मुक्त व्हावे असे आवाहन जिल्हा न्यायाधीश आर सी बर्डे , सचिव श्रीमती सोनल पाटील ,बारामती वकील संघटना अध्यक्ष अॅड प्रभाकर बर्डे आणि महावितरण यांनी केले आहे.
