स्टिंग ऑपरेशनच्या नावाखाली बलात्कार; दोघांविरोधात गुन्हा दाखल

बारामती : स्टिंग ऑपरेशनचे काम असल्याचे सांगत दोन सोशल मीडियाच्या प्रतिनिधींनी महिलेला लॉजमध्ये नेऊन बलात्कार केल्याची धक्कादायक घटना बारामती एमआयडीसी परिसरात घडली. याप्रकरणी शेख अझहर कादरी ( रा. कोंडवा, पुणे ) आणि ओंकार राजेंद्र शेलार ( रा. भिगवण, ता. इंदापूर ) या दोघांविरोधात बारामती तालुका पोलीस ठाण्यात गुन्हा दाखल करण्यात आला आहे. तपास उपविभागीय पोलीस अधिकारी डॉ. सुदर्शन राठोड करीत आहेत.

सविस्तर घटना अशी की ,दि. 03 ऑक्टोबर रोजी रात्री 8 च्या सुमारास पीडित  फिर्यादी यांना स्टिंग ऑपरेशनच्या निमित्ताने काम असल्याचे सांगून आरोपींनी बारामतीत आणले. त्यानंतर एमआयडीसी येथील व्हीआयपी लॉजमध्ये नेऊन रात्री 11 वाजताच्या सुमारास पीडिता फिर्यादीच्या इच्छेविरुद्ध शारीरिक संबंध केले, घटनेची  मोबाईलमध्ये चित्रीकरण केले.

फिर्यादी रडू लागल्यावर आरोपींनी फिर्यादीला जातिवाचक शिवीगाळ करून “तू म**र जातीची आहेस, तुमच्याकडे असं चालतंच” असे म्हटले. तसेच कुणाला काही सांगितले तर जीवे ठार करण्याची धमकी दिली आणि मुलांनाही मारून टाकण्याची धमकी दिली.  पुढील दिवशी 4 ऑक्टोबर रोजी सकाळी आरोपींनी फिर्यादी यांना घरी सोडले. त्यांनतर फिर्यादीस पुन्हा शिवीगाळ व दमदाटी केल्याने फिर्यादी यांनी दोघांविरोधात बारामती तालुका पोलीस ठाण्यात तक्रार नोंदवली .