उपमुख्यमंत्री अजित पवार यांच्या घरासमोर वंचित बहुजन आघाडीचे आंदोलन
बारामती : अनुसूचित जाती, जमाती व नवबौद्ध घटकातील नागरिकांच्या हक्काचा सामाजिक न्यायाचा निधी मुख्यमंत्री लाडकी बहिण योजनेला वळवून अन्याय केल्या कारणाने वंचित बहुजन युवा आघाडीच्या वतीने उपमुख्यमंत्री अजित पवार यांच्या घरासमोर आंदोलन करण्यात आले.
विधानसभा निवडणूक डोळ्यासमोर ठेवून कोणाचीही मागणी नसताना लाडकी बहीण योजना काढली या योजनेमार्फत महिलांना दरमहा 1500 देण्यात येतात मात्र या योजनेसाठी राज्य सरकारने दिनांक 2 मे 2025 रोजी शासन निर्णय क्र. मवबा-2025/प्र.क्र. 83/ कार्या- या शासन निर्णयानुसार अनुसूचित जाती अनुसूचित जमाती व नवबौद्ध घटकातील नागरिकांसाठी समाज कल्याण मार्फत राबविण्यात येणार्‍या योजनांचा 410.30 कोटी (अक्षरी 410 कोटी तीस लाख रुपये ) इतका निधी सामाजिक न्याय व विशेष सहाय्य विभागाकडून महिला व बाल विकास विभागास वळवला आहे. यामुळे वंचित बहुजन युवा आघाडीने सरकारचा आंदोलनादरम्यान जाहीर निषेध केला.
अनुसूचित जाती, जमाती व नवबौद्ध घटकातील नागरिकांच्या हक्काचा निधी, त्यांचे जीवनमान सुधारण्यासाठीचा निधी, शिक्षणासाठी खर्च करावयाचा निधी, अत्याचार ग्रस्त लोकांचे पुनर्वसन करणारा निधी, घरकुलासाठी वापरणारा निधी, व्यवसाय सुरू करण्यासाठीचा निधी, भूमिहीन शेतकऱ्यांसाठीचा निधी व इतर सामाजिक न्याय देण्यासाठी वापरावयाचे निधी अत्यंत चुकीच्या पद्धतीने वळवून बेकायदेशीर कृत्य केले आहे. अशाप्रकारे निधी वळवू शकत नसताना सामाजिक न्यायाचा निधी वळून अनुसूचित जाती जमाती व नवबौद्ध घटकातील नागरिकांवर राज्य सरकारने अन्याय केला असल्याचे जिल्हाध्यक्ष मंगलदास निकाळजे यांनी व्यक्त केले. राज्य सरकारने तात्काळ अनुसूचित जाती जमाती व नवबौद्ध घटकातील नागरिकांचा हक्काचा निधी पुन्हा त्याच विभागाला परत कराव तसेच यासाठी बजेटचा कायदा करावा अन्यथा राज्यसरकारच्या मंत्री महोदयांना रस्त्यावर फिरू देणार नाही असा इशारा दिला.
यावेळी उपस्थितांच्या वतीने तहसीलदार गणेश शिंदे यांना निवेदन देण्यात आले तर वंचित बहुजन युवा आघाडीचे जिल्हाध्यक्ष मंगलदास निकाळजे, उपाध्यक्ष गणेश थोरात, महासचिव प्रतीक चव्हाण, सहसचिव कृष्णा साळुंके, बारामती तालुकाध्यक्ष अनुप मोरे, इंदापूर तालुका अध्यक्ष, कीर्तीकुमार वाघमारे, दौंड तालुका अध्यक्ष विशाल शिंदे, जितेंद्र कवडे, किशोर मोरे, सागर गवळी, मंगेश सोनवणे, जितेंद्र जगताप, प्रीतम कांबळे, अण्णा घोडके, आर्यन साळवे, आसिफ शेख, शिवाजी बनसोडे आदी कार्यकर्ते उपस्थित होते.
