एससी,एसटी समाजाने पुकारलेल्या बारामती बंदला उस्फुर्त प्रतिसाद
बारामती : मा.सर्वोच्च न्यायालायने एससी,एसटी समाजाच्या आरक्षणाला क्रिमीलेयर लावण्याचा व त्याचे वर्गीकरण करण्याचा अधिकार केंद्र व राज्य सरकारला देत असल्याचा निर्णय दिला आहे. सर्वोच्च न्यायालयाचा हा निर्णय एससी एसटी समाजात फूट पडणारा व त्यांची एकता तोडणारा असल्याचे सांगत सर्वोच्च न्यायालयाच्या या निर्णया विरोधात देशभरातील एससी एसटी समाजाने भारत बंदची हाक दिली होती. त्या पार्श्वभूमीवर बारामतीत देखील या बंदला सर्वच स्तरातून उस्फुर्त प्रतिसाद देत कडकडीत बंद पाळण्यात आला. त्याचबरोबर शहरातील सिद्धार्थनगर येथून निषेध मोर्चा देखील काढण्यात आला होता . पुढे या निषेध मोर्चाचे रूपांतर बारामती नगर परिषदेसमोर निषेध सभेत झाले. यावेळी विविध पक्ष संघटनांसह हजारो समाजबांधव या निषेध मोर्चा मध्ये सहभागी होत निषेध सभेस उपस्थित होते.
मा.सर्वोच्च न्यायालयाने दिलेला हा निर्णय आम्हाला मान्य नसून सर्वोच्च न्यायालयाने जरी परवानगी दिली असली तरी आम्ही एससी आणि एसटी समाजाला क्रिमीलेयर लावणार नाही आणि त्यांचे वर्गीकरण करणार नाही अशी ग्वाही केंद्र व राज्य सरकारने दिली पाहिजे अशी मागणी यावेळी करण्यात आली.
या निषेध सभेमध्ये माजी नगराध्यक्ष कैलास चव्हाण, बसपाचे काळुराम चौधरी, माजी उपनगराध्यक्ष नवनाथ बल्लाळ, माजी नगरसेवक गणेश सोनवणे, गौतम शिंदे, शुभम अहिवळे, सामाजिक कार्यकर्ते अनिकेत मोहिते, वंचितचे मंगलदास निकाळजे, सीताराम कांबळे, धीरज लालबिगे, अक्षय माने, कॉंग्रेसचे अशोक इंगुले, पार्थ गालिंदे, अक्षय गायकवाड, भाजपाचे सचिन साबळे, माजी नगरसेविका आरती शेंडगे, अस्मिता शिंदे, आदींनी आपले मनोगते व्यक्त करून या निर्णयाचा निषेध व्यक्त केला. त्यानंतर तहसीलदार गणेश शिंदे यांना उपस्थितांच्या वतीने निवेदन देण्यात आले.
