बापरे….बारामतीत एकाच दिवशी चौथी घरफोडीची घटना उघड

बारामती : बारामतीत शहरात एकाच दिवशी चार घरफोड्या घडल्याच्या घटना घडल्या आहेत, तर या चार घटनांपैकी एक घटना चक्क शहर पोलिस ठाण्याच्या हाकेच्या अंतरावर घडली आहे. या चारही घटनेत साधारण सात लाख 64 हजार सातशे रुपयांचा मुद्देमाल घरफोडी करणाऱ्या चोरांनी लंपास केला आहे. यामुळे शहरातील नागरिकांमध्ये दिवसेंदिवस घबराटीचे वातावरण पसरत आहे.

यापूर्वी बारामती शहरातील जामदार रोड येथील घटनेत दि 14 जुलै रोजी भर दिवसा घरफोडी घडली असून यात अज्ञात चोरट्याने बंद दाराचा कडी-कोयंडा कापून घरातील सोन्या-चांदीचे दागिने चोरून नेले आहेत. यात चोरट्याने साधारण चोवीस हजार पाचशे रुपयांचा मुद्देमाल चोरून नेला आहे. तर दुसऱ्या घटनेत येथील विश्वास नगर येथील, देवराज अपार्टमेंटमधील एकाच वेळी दोन सदनिका चोरट्यांनी फोडल्या असून दोन्ही सदनिकामधील सोन्या-चांदीच्या दागिन्यांसह रोख रक्कम असा दोन लाख आकारा हजार दोनशे रुपये घरफोडी करून लंपास केली आहे.

तर आता चौथी घटना शहर पोलिस ठाण्याच्या हाकेच्या अंतरावर असलेल्या गुजर इस्टेट बारामती हॉस्पिटल नजीक घरफोडी घडली आहे. या घटनेत घरात प्रवेश करण्यासाठी घरफोडी करणारांनी कडी कुलुप तोडून घरात प्रवेश करून त्यामध्ये सोन्या-चांदीचे दागिने, रोख रक्कम आणि एक दुचाकी असा साधारण पाच लाख 29 हजारांचा ऐवज चोराला आहे.

चार घरफोडीमध्ये साधारण सात लाख 64 हजार सातशे रुपयांचा ऐवज घरफोडी करून लंपास केला आहे. चारही घरफोडीचे गुन्हे शहर पोलिस ठाण्यात तीन वेगवेगळ्या फिर्यादींनी दाखल केले आहेत.या प्ररकरणी युद्धपातळीवर पोलिस यंत्रणा तपास करीत आहे.